Ljóð dagsins

VEÐURVÍSUR  - Jónas Hallgrímsson

Hart vor

 

Hóla bítur hörkubál,

hrafnar éta gorið,

tittlingarnir týna sál.

Tarna er ljóta vorið!

Vornæðingur

 

Út um móinn enn er hér

engin gróin hola.

Fífiltóin fölnuð er -

farðu í sjóinn, gola!

Sunnanvindur

 

Sunnanvindur sólu frá

sveipar linda skýja.

Fannatinda, björgin blá,

björk og rinda ljómar á.

Sumarhret

 

Nú er sumar í Köldukinn, -

kveð ég á millum vita.

Fyrr má nú vera, faðir minn,

en flugurnar springi af hita!

Molla

 

Veðrið er hvorki vont né gott,

varla kalt og ekki heitt.

Það er hvorki þurrt né vott,

það er svo sem ekki neitt.

Niðaþoka

 

Búðarloka úti ein

er að gera á ferðum stanz, -

úðaþoka, hvergi hrein,

hún er úr nösum rækallans.

Rigning

 

Skuggabaldur úti einn

öli daufu rennir.

Skrugguvaldur, hvergi hreinn,

himinraufar glennir.

Útsynningur

 

Útsynningur yglir sig,

eilífa veðrið skekur mig.

Ég skjögra eins og skorinn kálfur, -

skyldi ég vera þetta sjálfur!

Bloggfærslan er alfarið á ábyrgð skrifanda en endurspeglar ekki á neinn hátt skoðanir eða afstöðu mbl.is, og Morgunblaðsins.

 

Athugasemdir

[Helga Guðrún Eiríksdóttir, 26.4.2008 kl. 10:12]

Við þetta er fátt að bæta, nema kannski fallegri vísu eftir Egil Jónasson:

Blessuð jörðin vill bæta og laga
blómin vaxa og sólin skín.
Fyrir svona dýrðardaga
drottinn þarf ekki að skammast sín.