Omagh

Í kvöld verður sýnd í sjónvarpinu kvikmynd um hryðjuverk The Real Irish Republican Army, RIRA í Omagh á Norður Írlandi. Myndin fjallar um eftirmála þessa illvirkis sem framið var þann 15. ágúst árið 1998. Í sprengingunni létust 29 manns og um 300 slösuðust, þar af margir mjög alvarlega. Þeir sem létust voru af ýmsum uppruna, jafnt kaþólikkar sem mótmælendur, innfæddir og ferðamenn, karlar, konur og börn. Ódæðismennirnir skildu bílinn með sprengiefninu eftir í fjölfarinni verslunargötu því þeir fundu ekki bílastæði við dómhús bæjarins sem átti þó að vera skotmarkið. Þegar þeir hringdu og vöruðu við yfirvofandi sprengingu voru þeir svo ónákvæmir í lýsingum að fólk streymdi í átt að sprengjustaðnum en ekki frá honum. Þó sögðu æðstu menn RIRA þessa ónákvæmni ekki hafa verið ætlunarverk sitt og báðust afsökunar á ódæðinu. Afsökunarbeiðnin dugði þó ekki til að endurlífga konuna sem var þunguð af tvíburum, ömmur, afa, frændur og frænkur, syni og dætur. Þarna létust létust líka þessar tvær manneskjur sem meðfylgjandi mynd er af. Þessi mynd var tekin rétt áður en sprengjan sem falin var í rauðbrúna Vauxhallnum sprakk með fyrrgreindum afleiðingum. Myndavélin fannst innan um brak og líkamsleifar á staðnum.

Þessi skelfilegi atburður varð þó til að hraða friðarviðræðum á Norður Írlandi, en ættingjar fjögurra barna sem fórust í sprengingunni höfðuðu einkamál gagnvart hinum grunuðu hryðjuverkamönnum og RIRA. Auk þess krefjast ættingjar allra þeirra 29 sem fórust sömu aðila um 2 milljón punda skaðabætur.