1987

Árið 1987 var rosalega gott og skemmtilegt ár. Get ekkert útskýrt í stuttu máli hvers vegna, mér bara fannst þetta þá og þykir enn. Meðal þess sem gerðist þetta ár var að Kringlan hóf starfsemi sína, fyrsta slíka verzlanamiðstöðin á Íslandi.

Í dag var heilmikil hátíð í Kringlunni til að halda upp á 20 ára afmælið. Það er hrikalegt til þess að hugsa að Kringlan sé á svipuðum aldri og ég var þegar hún opnaði.

En hvað um það, við vorum á vappi í Kringlunni í dag þegar nokkrir leikarar stigu á svið og áttu að sýna tízkuna frá þessu herrans ári 1987. Það mistókst svolítið fannst mér. Það voru ekkert allir klæddir eins og geðsjúklingar á níunda áratugnum. Það sem efst var á baugi í tízku ársins 1987 á Íslandi, voru snjóþvegnar og steinþvegnar gallabuxur, og flestir strákar voru í röndóttum skyrtum. Auðvitað voru herðapúðarnir og blásna hárið á sínum stað. Fötin sem leikararnir klæddust voru einhvers konar skræpóttir gallar í æpandi neon litum, múnderingin líktist meira íþróttatízku ársins 1983 eða eitthvað, svona Flashdance dæmi. Alveg ógurlega fyndið en ekki rétt í sögulegu samhengi.

Leikararnir tóku síðan syrpu laga sem átti að sýna tíðarandann og gerðu það ágætlega. Eina sem vantaði var eitthvað lag frá 1987. Þau sungu fullt af poppi frá 1984 sem var að mínu mati fínt ár í popptónlist, elsta lagið var frá 1979 og það yngsta sennilega frá 1986. Það var ferlega gaman að heyra þessa gömlu smelli og sjá þau stíga villtan dans í anda níunda áratugarins, meira að segja með hjálp Kringlugesta - ja, Kringlugests.

Með þessarri færslu fylgja tvær myndir, önnur úr tízkublaði og hin af venjulegu fólki árið 1987. Óneitanlega hefur nú ýmislegt breyst.

Athugasemdir

[Jóna Á. Gísladóttir, 18.8.2007 kl. 20:31]

Skemmtileg færsla hjá þér. Þetta er eitt af fáum tímabilum í tískunni sem ég barasta get ekki séð koma aftur. Það er algjörlega óhugsandi. Þetta var svo hrikalega hallærislegt og ÓSMEKKLEGT tískutímabil.

[Markús frá Djúpalæk, 18.8.2007 kl. 20:56]

Það er ekki víst að neitt af þessarri tísku komi aftur. Guð gefi ekki.

[Gunnar Ásgeir Ásgeirsson, 19.8.2007 kl. 02:15]

Ekki má nú gleyma því að rúmlega mánuði síðar kom ég í heiminn. Það var nú merkisdagur enda stórlax. En jú ég held að það sé nú fínt ef að allir færu nú að klæðast jogginggöllum, skella á sig svitabandi og blása hubba bubba tyggjó og hækka aðeins í ´80s tónlistinni aftur. Hví ekki það.. Eða nei kannski ekki, það má dæma um hvort þetta sé hallærislegt. ´80s tónlistin er nú góð og aldrei heyrir maður nú nóg af henni en þetta er orðið to much þegar joggingallarnir og svitabandið er dregið upp.