Stressið í vinnunni getur verið yfirþyrmandi

Mig bráðvantaði nokkurra daga frí í vinnunni en ég þóttist vita að Arnþrúður myndi  ekki  taka  það  í  mál. Þá datt mér í hug að hugsanlega myndi hún leyfa mér það ef ég hegðaði mér eins og geðbilaður maður.

Svo að ég brá á það ráð að hanga öfugur í loftinu og gefa frá mér furðuleg hljóð. Snæbjörn tæknimaður  spurði mig hvað í ósköpunum ég væri að gera. Ég sagði honum að ég ætlaði að þykjast vera ljósapera svo að Arnþrúður héldi að ég væri kexruglaður og gæfi mér nokkurra daga leyfi. Skömmu síðar  birtist hún á skrifstofunni og sagði við mig: "Drottinn minn,  hvað  ertu  að  gera, Markús?"   Ég  sagði henni sem var, að ég væri ljósapera. Hún svaraði að bragði:"Þú ert greinilega yfir þig stressaður, það fer ekki á milli mála. Farðu heim og vertu þar í nokkra daga og reyndu að ná þér."  Ég stökk niður og gekk út af skrifstofunni. Þegar Snæbjörn elti mig spurði útvarpsstjórinn hvert hann væri  eiginlega  að  fara.  Hann svaraði:   "Ég er líka farinn heim. Þú getur hreinlega ekki ætlast til þess af mér að ég vinni í þessu myrkri!"

Friðþæging - Mögnuð kvikmyndaupplifun

Í gærkvöldi fékk ég tækifæri til að sjá hina stórkostlegu mynd Atonement, eða Friðþægingu. Henni er leikstýrt af Joe Wright og byggð á  skáldsögu eftir Ian McEwans með sama nafni.

Án þess að ætla að ljóstra of miklu upp um söguþráð myndarinnar sýnir hún hvernig hæglega er hægt að rústa nokkrum mannslífium með því að bera á manneskju rangar sakir, hvort sem það er viljandi eða óviljandi. Eitthvað sem við bloggarar ættum kannski að muna stundum.

Atonement er gríðarlega sterk mynd, vel gerð og leikin enda tilnefnd til sjö Óskarsverðlauna. Keira Knightley og James McAvoy eru feiknafín í hlutverkum sínum, en mér fannst frammistaða þeirra þriggja sem leika Briony Tallis, örlagavald sögunnar, algerlega stórkostleg, sérstaklega hinnar tólf ára gömlu Saoirse Ronan sem getur sagt heila sögu með augnaráðinu einu saman.

Ég get ekki annað en mælt með þessarri mynd, hún er hrein veisla fyrir augað. Mannleg og mögnuð mynd, stundum fyndin, stundum gríðarlega sorgleg en alltaf mjög raunveruleg og ótrúlega sláandi.